Archiv Gronzer-News
Alli Brichte ond News us vergangene Ziit chönd ehr done go nocheläse.
Vöu Spass ;) !
Grunzer-Party 2023
Ond scho esch sie weder verbi, üsi Grunzer-Party 🐷🥳!
Mer luege zrog uf paar strängi, aber lostigi Täg ond danked aune Bsuecher, wo ah dem Wochenendi ehre Wäg uf Äbersecke gfonde hei!
Gstartet het üses Grunzer-Wochenendi metem Raclette-Plousch, wo mer das Johr s erste Mou döregfüehrt hei. Es esch ongloublech toll gse, wie vöu vo üch üs onderstötzt hei ond mer dorom sone soumässig tolle Obe hei döffe fiire.
Am Samstig-Obe esch es de met de Grunzer-Party witergange. Im Kaffizäut, de Party-Halle met Shotbar ond ih üsem Bonker esch flissig gfäschtet ond ahgstosse worde🍻.
För üs Mitglieder esch es de ahschliessend grad as Ufrume gange. Nochere schloflose Nacht ond emene feine Rösti-Zmorge vom Stärne (danke ah dere Stöu vöu mou!) het de noch dene Ahsträngige aber ou uf üs üsi legendäri After-Party gwartet, wo de ou mer hei chönne Gas gäh😎.
Ganz bsonders wei mer üs aber bi üsem OK bedanke, wo das Ganze ufd Bei gstöut ond organisiert het.
Vo Setzige, öber Bouplanige, Ihchöif, Arbeitsihteilig, Strom organisiere, Sitzordnid erstelle ond, ond, ond esch einiges hendeför abgloufe ond mer freuid üs dröber, wie die ganzi Organisation klapped het.
Bes zom nöchste Johr🤪!
Seilzieh Plausch-Turnier
Wie au Johr hei mer Grunzer gester am Plouschturnier vom Seilziehclub Äbersecke döffe teilnäh ond zwöi Mannschafte stelle. Met vereinte Chräft esch Seilizoge ond ahgfüred worde.
So hets de eini vo üsne zwe Mannschafte ou is Final gschafft, wo d Grunzer uf üsi Guggefrönde vo de Blächschränzer troffe send.
För de ersti Platz hets de leider knapp ned glänged, aber das het üs ned devo abghaute, glich metenand ahzstosse ond ah de Bar nomou Gas z gäh.
Mer dankid im Seilziehclub förs Organisiere vo dem super Obe ond sägig „Bes zum nöchste Johr!“
Rückblick Motocross Ebersecken
Am vergangene Wochenendi hei mer Ricke-Grunzer am Motocross z Äbersecke döffe aus Durstlöscher am Start si. Gstartet hend mer am Donnstig-Obe metem Ufstelle vom Fäschtzäut ond de Bierwäge. Dör d Leitig vo üsem OK ond flissige Methöufer hei mer das de ou zackig ufs Bei gestöut gha. Am Fritig-Obe esch es de gmüetlech meteme Fürobe-Bier losgange, nochdem dör de Tag döre no die letzte Vorbereitige troffe worde sei. So sei ou mer pönktlech startklar gse. Am Samstig Morge früeh send de die erste Motore ahgloufe ond d Rennstrecki esch in Ahgreff gno worde. Offiziell ufgange send d Startgatter de om die 10i för de ersti Louf. Ond so hei mer ond natürli ou d Zueschouer spannendi ond rasanti Renne döffe metverfouge. Am Obe esch es de met Bar- ond Fäschtbetrieb witergange. Sowohl d Bsuecher, aus ou de eint oder ander Grunzer esch vor de Bar ahtzräffe gse. Bes id Morgestonde esch de gfäschted worde ond mer hei üs rüdig öber alli gfreut, wo sei cho ineluege ond öbbe eis, zwöi sei cho näh! So esch de de Morge ou ender gli weder vor de Tör gstande ond witer esch es gange met de erste Renne vo de schnöuste Fahrer vode Schwiiz. S Wätter het sech ou am Sonntig vo sinere beste Siite zeigt ond mer hei vo chli bes gross, jong ond aut ganz vöu vo üch döffe begrüesse. Metere guete, usglassnige Stemmig esch es gäge Obe ond de ou em Ändi vom Motocross Äbersecke 2023 zuegange. Ah dere Stöu wei mer üs ganz härzlech bi aune Bsuecher bedanke! Schön, send ehr cho, danke vöu mou! Mer hei üs rüdig öber dä glungeni Ahlass gfreut. Zom Schloss got ou no e grosse Dank use ah üses OK, wo rüdig vöu zo dem Wochenendi biitreit het! Pädi, Ueli ond Joel: Merci vöu mou, ehr send die wohre Öberflieger ;) !
GV 2023
Am 29. April 2023 hei d Grunzer ehri alljöhrlechi GV im Lamm z Ridu döffe abhaute. Nochere muntere Begrüessigsrondi onder de Aktiv- ond Passiv-Mitglieder esch es de as Schnouse gange. Üs esch es rechtigs Fästässe serviert worde, so dass mer üs de ou gstärkt üsne Traktande ond Ahträg hei chönne stelle. Danke vöu mou ah dere Stöu i de Barbara för die super Verpflegig ond de Service! Noch diverse Abstemmige stoht jetzt ou üses nöchste Motto förd Fasnacht 2024 fest sowie üsi neue Lieder. Üsere Kleider- ond Musikkommission stoht auso nüd meh im Wäg bide witere Vorbereitige. Mer döffe die nöchsti Fasnacht ou vier neui Grunzerli i üsem Verein begrüesse, wo üs musikalisch ond ah de Bar wärdid onderstötze. Liebi Fabienne ond Nora, liebe Philipp ond Tim, mer freuid üs rüdig öber üche Bitrett id Grunzer ond uf die kommendi Ziit met üch! Leider hei mer üs aber ou vo einige sehr wärtgschätze, langjährige ond legendäre Grunzer mösse verabschiede, wo sech dezue entschlosse hei, zo de Passive z wächsle, respektive de Verein z verloh. Mer dankid üch ganz vöu mou för die (vöune) treue Vereinsjohr, üche onermüedleche Isatz ond för die geniali, soumässig tolli Ziit, wo mer met üch hei döffe erläbe! Mer wärdid üch vermesse ond hoffid, üch baud weder einisch (ah de Bar) ahzträffe! Zom Schloss wend mer ou üsem Vorstand e spezielle Dank usspräche, wo üs zielsicher dörs Vereinsjohr füehrt ond üsi Troppe organisiert. Danke vöu mou ou der, Jönu, för dini Arbeit aus üse El don Presidente, mer schätzid das sehr! Etz heisst auso eifach no chli Gedoud ha, bes es de im Herbscht weder losgot ond mer weder chöi säge: "Endlich wieder Fasching!"
Gronzer auf Reisen!
22.04.2023 / 23.04.2023 Ou das Johr hei d Grunzer zäme es Wochenendi uf Reise döffe go. Los gange eschs am Morge am 6i metem Eurobus ond eme feine Apéro. Üse för üs bereits bekannti Chauffeur Roger het üs secher as Ziil brocht ond üs pönktlech am 11i z Stuttgart för die ersti Schecht am Früehligsfäscht abglade. Noch blitzschnöue Umzieh-Aktione im Hotel-WC, damit mer ou jo ned s erste Mass Bier verpasse, sei mer de i Dirndl ond Läderhose is Göckelesmaier-Zäut marschiert, wo üs e glichgsennte ond trinkfreudige Huufe empfange het. Onder "O' zapft is" ond Gejohle hei d Grunzer de uf e soumässig gueti Ziit agstosse ond afo fäschte. Am 4i sei mer de aber witerzoge is Grandls-Hofbräu-Zäut. Eis, zwöi Mass hei natürli ou det ned döffe fähle ond so hets haut weder gheisse "Hoch die Krüge". Mitere super Stemmig hei mer de bes id Nacht ie witergfiired ond allerhand erläbt, wo am nöchste Tag vöu z berichte gäh het. Met diverse Souvenirs ond ganz vöu gueti Erläbnis ond Erinnerige eschs de am Sonntig weder as zämepacke gange. Nocheme feine Zmorge ond Zämmesammle vo aune Grunzerlis hei mer üs weder ufe Wäg zom Car ond Rechtig hei gmacht. So sei mer pönktlich im spötere Nomittag weder z Äbersecke ahcho, wos as Verabschiede gange esch. Es esch eifach soumässig grandios gse! Fäbi ond Nina, merci vöu vöu mou förs organisiere ond plane ond dass mer dör üch so es Wahnsinns-Wochenendi hei döffe erläbe!
Fasnacht 2023
Metere super geniale ond vorfreudige Stemmig sei mer am Mettwoch-Obe vorem Schmudo z Mauters ih die lang ersehnti Fasnachtswoche gstartet ond heis loh krache. Witer esch es de am Morge uf Autbüre gange ah Omzog. S Wätter het sech vo sinere beste Siite zeigt ond üs e grandiose Start erloubt. Es esch dorom eifach nome e Spass gse. Am Obe hets üs de witertriebe as Schmudofäscht uf Winike, wo mer om Mitternacht no einisch vou Gas gugget hei. De Fritig het de meteme Ständli gstartet för üsi Säuli-Gwönner. Mer sei meteme super feine Apéro begrüesst ond empfange worde ond hend es riese Gaudi gha, üch öbbis döffe vor z spele. Danke üch ah dere Stöu vöu, vöu mou! Ahschliessend send mer witer greist uf Reide för de Omzog. Ou do emmer no in Begleitig vo schönstem Sonneschiin. S ahschliessende Fäscht met üsem Uftrett hei mer de ou i volle Zög chönne gniesse. Am Samstig eschs för üs de uf Dagmerselle gange för ne witere Omzog. S geniale Wätter het üs ou det ned im Stech gloh ond üs witer troche ond munter loh Fasnacht fiire. Baud eschs de aber Ziiit worde, weder i Car izstiege, om üses Reisli uf Lungern azträte. In Begleitig vo ehemolige Mitglieder hets einiges z bespräche ond fiire gäh ond mer hei e super Obe ide Innerschwiiz erläbt. De Fasnachts-Sonntig het üs ned wiit ewäg verschlage, nämli uf Autishofe före Omzog ond de Schlossrugger-Ball. D Stemmig ech grandios gse ond es esch schön gse, ah dene vöune "Geuggus" döffe verbizloufe ond metenand chli z gugge. Am nöchste Morge hend mer usnahmswiis ned eso früeh us de Fädere mösse, wöus för üs erst am Obe metem Schränzerball z Pfaffnau witergange esch. Deför semmer de am Zistig för üse letzti Tag weder gli uf de Bei gse zom üs parat z mache förd Tanneschleipfete z Luthere. Ond emmer no het üs de strahlendi Sonneschiin ned verloh ond üs eso de perfekti Abschloss gäh förd Fasnacht 2023. Mer wend aune ganz härzlech danke, wo üs während dere Fasnachtswoche onderstötzt ond met üs metgfiebered hend ond üs dorom e wonderbari, grandiosi, "soumässig" gueti Ziit ermöglecht hei! Es riesigs Merci got dorom ou use ah üse Tourplaner, Präsidänt ond Tambi förs Plane ond Organsiere, ehr send de Wahnsenn! Danke vöu, vöu mou för die rüüüüdig schöni Fasnacht!